西斜單位電費會貴啲？ [香港經濟日報] 2022-07-15

近日天氣酷熱，據天文台數據顯示，本周一（11日）市區氣溫達到攝氏35.1度，上水更達36.8度，打破今年最高紀錄。炎炎夏日，安坐室內歎冷氣當然寫意；不過，當閣下收到電費單時，可能會有另一番體會，有小小「肉赤」。

家中冷氣由朝開到晚

有網民帖文表示，有友人租樓住，租樓時正值冬天，當時無考慮夏天熱唔熱的問題，所以租住了一層西斜樓。而友人太太懷孕後申請咗wfh（在家工作）。炎炎夏日下，家中冷氣由朝開到晚，廳房冷氣輪流當值，友人心想日後電費一定好貴。另一友人直言買樓租樓都唔好揀西斜樓，除了白天不用開燈之外，西斜樓無特別好處，即使層樓幾平都要認真考慮。

常言道，買樓要買向南樓，皆因涉及氣象問題。據悉，向南樓背向北面，冬天受到東北季候風的影響較少，至於夏天則有南面海洋的風，會較涼爽。簡單來說，向南樓是冬暖夏涼。

地理不同 揀坐向也有別

向南樓有向東南，西南之分。若單位向西南，中午後，單位就有陽光，而且受西斜影響。從前不少發展商都着重對流窗，若設對流窗，可減少有關影響，惟近年部分新盤都忽略對流窗設計。至於，向東南一早有太陽，要瞓得晏小小就要拉窗簾，而每年3、4月會比較潮濕，可說是有辣有不辣。

但亦有因地理不同，揀坐向亦有不同之處，正如將軍澳眾所周知相當潮濕，所以部分買家揀樓時反而首選西南，務求太陽入屋，曬衫超快乾，返工後都不怕西斜。但若是有老有幼的家庭就要好好考慮西斜問題。有搵樓客表示，原本住開西斜單位，夏日屋內份外悶熱，白天廳冷氣幾乎長開，每月電費動輒約2,000元，故搵樓講明要揀向南。