甲廈租客增 租用面積減 [明報] 2024-08-08

特首曾經話雖然有不少公司執笠，但亦有不少公司開張，甚至出現閂一間，開1.6 間，當然畀有心人笑到面黃。但我覺得唔錯得晒，舖位、住宅甚至非甲廈都唔可能閂一間，開1.6 間，但甲廈絕對有可能，當然很多人唔同意，但事實勝於雄辯。

3 年疫情過後，甲廈租客的形態有變，以往有不少租用大面積租客，現在都減少租用面積，業主唯有吸納多一些租客，以我們公司為例，甲廈租客數目已經超過疫前，但仍然有15％空置率，如果全部租出，租客的數目大幅增加，就算去到閂一間，開16間都唔出奇。

其實對香港來說是好事，令到更多公司可以搬去甲廈，尤其是在中環的甲廈，不少公司夢寐以求，但以往不但呎租貴，而且如果不是租用大面積，業主未必有興趣。現在當然唔同，比較次一級的甲廈，千幾呎都有交易，滿足了不少有需要但又未能租用大面積的租客，甚至滿足不少租客虛榮心。

甲廈間細出租 吸納更多人來港

我講大家都未必會相信，將甲廈間細出租，竟然可以吸納更加多人來香港，原因是有不少國內人打算在香港設立家族辦公室，如果租唔到甲廈，他們未必有興趣。現在又唔同，不但有很多選擇，甚至可以慢慢揀，而租用的面積又不需要太大，一個家族辦公室要求的面積，千幾呎就夠，愈多家族辦公室在香港設立，代表更多人在香港消費，買更多香港住宅，聘用更多香港人，對香港來說是利多於弊。