李寧月租200萬闖尖沙咀名店街 [東方日報] 2022-09-07

香港被疫情蹂躪超過兩年,零售業重創。正當唔少品牌捱唔住選擇止蝕離場之際,據報國產體育品牌李寧(02331)竟逆市發圍,計劃進駐尖沙咀廣東道「名店街」,將開設第一家旗艦店。近日舖外已貼出李寧嘅品牌Logo,有指會喺第四季開業。

市傳呢間位於尖沙咀旅遊區、面積逾7,000方呎嘅旗艦店,月租盛惠200萬港紙,成為呢期香港核心區最大單一舖租交易。不過,同舖位上手租客周生生(00116)最高月租700萬港紙相比,就平咗七成。

其實李寧喺2009年進軍過香港,喺尖沙咀都開過一間「李寧牌羽毛球專賣店」,無奈當時競爭力比唔上其他海外品牌,加上公司內地業務發展受阻,國際化策略都要暫停一陣,之後喺2012年回歸。

受惠「國潮」 內地市佔勁升

經過幾年大刀闊斧改革,李寧近年成功轉型,加上「新疆棉」風波引發「國潮」效應,國產品牌喺內地市場急起直追,形勢完全唔同晒。當然公司仲未放棄海外發展,李寧家族控制嘅非凡中國(08032)過去兩年先後將香港服飾品牌堡獅龍(00592)同英國鞋履品牌Clarks等收歸囊中。

唔知今次李寧香港新舖開張後,香港消費者反應如何?李寧股價尋日表現反覆,早段曾升1.93%,高見68.65元;全日微跌0.37%,收報67.1元。