坡基金撻訂反映的樓市 [am730] 2023-07-19

近日不少報道有關波老道21號華瑞資本撻訂蝕21億元，主題圍繞都是誠哥瞓喺度贏、坡佬淆底走人或者破香港歷史撻訂紀錄等等。今日想講返一些關小市民事的內容，華瑞資本創辦人劉中興在瑞銀做了19年，於2017年成立華瑞，頭一年尋找資金沒想像中容易，跟做大行時有落差，辛苦經營累積到40億美元AUM，即大概300億港元。基金來說算中型，去年9月與長江實業集團(1113)以207億元達成買賣協議，買入波老道21號百多個單位加車位權益。當中重點是長實會協助出售給散戶，華瑞發言人當日指，對內地及香港經濟前景有信心，而且不是得把口，真金白銀落注以表示支持。

說白他們是豪宅炒家，睇好疫情後香港豪宅市場會回升，加上大批買，散貨有水位，地頭蟲長實又會幫手賣樓唔使自己再搵團隊，而且這類基金要求並不太高，一年賺十個巴仙已交到功課，幾十當然更好啦！誰不知賣了9個月，只賣出5伙，成交價跟他的批發價一樣，開關半年有多，仲係咁樣？當然要求長實減價先有水位，傾唔埋欄唯有輸少當贏，21億元佔基金成個AUM的7%。你話外資點睇香港經濟？當然他們也會睇錯啦。新加坡近年水多係人都知，基金當然水漲船高，資金一定要搵出路，近年東南亞國家如馬來西亞、柬埔寨、印尼等的物業市場都滿是坡佬基金身影，特別是柬埔寨，新加坡資金近兩年已取代內地資金成為第一資金流入國，華瑞第一次投香港房產就「聲名大噪」，你覺得其他外資基金會點睇香港？