有行家同我講，汪敦敬真係唔抵，在3 年前曾經講過，如果當日唔買樓，3年後就會後悔，今日樓價比3 年前下跌了17% ，立刻畀人封佢做新「燈神」，代替了剛剛退休的「大師」。行家話，被人叫新「燈神」當然唔開心，但叫佢做新「燈神」的人，99％都無老汪咁有錢，行家搞錯，是100 ％，因為有錢過老汪的唔會叫佢做新「燈神」。
行家話，老汪有舖有樓，咁都被人叫新「燈神」，只會在香港發生。好似老汪咁樣，有50個舖位及住宅單位，身家一定超過1 億美元，可以列入億萬富豪行列，叫佢做新「燈神」都唔嬲，由此可見，香港人的心胸的確很廣闊。行家搞錯了，這並不是心胸廣闊，我經常亦會被人叫做「燈」，而且明知叫我做「燈」的人連一個自住單位都冇，但我唔敢嬲，如果我嬲，就會被人話咁「小器」，都唔講得笑，被人笑不如自己笑，一笑置之。
香港人唔明白叫一個有錢人做「燈」，即是話畀其他人知自己很窮，如果唔信，去澳門賭場睇吓，那些贏到盆滿缽滿，一大堆籌碼的人會不會被人叫做「燈」，其他賭仔只會跟紅，跟着那人落注。反之那些輸到面青口唇白，落注時揸唔定主意，唔知買莊買閒，如果輸咗就要跳樓，那些人才是「燈」，所以，叫人做「燈」即是咒人去死，點解要咁樣做？澳門人唔會叫人做「燈」。
其實，做評論員只是按自己分析做預測，經常都會預測錯誤，如果錯了就被人叫做「燈」，試問又點會有人做評論員。市場只有一種聲音，就好似現在，大家就一窩蜂講樓市下跌，在七八年前，就一窩蜂講樓市上升，令大家失去警覺，到最後損失的是一般市民，今日錯失了入市機會，七八年前就入錯市。講到「明燈」，始終比較適用於偏門，樓市是正行生意，用「燈」做指引並不恰當。
Comments