近日資助出售房屋撻訂消息浪接浪，2021年綠置居鑽石山啟鑽苑暫錄120宗撻訂個案，佔售出單位接近6%；另外北角驥華苑一個高層的「樓王」單位亦出現「撻訂」。
樓價指數創逾7年低
差估署最新發表的樓價指數，為連跌9個月，今年1月份報306.4點，相較去年12月的311.3點，按月跌約1.57%，創2016年11月以來逾7年新低。面對樓價回落，抽中新居屋的準買家，無疑心大心細；且又目睹近日新居屋連番撻訂消息，心中難免忐忑，究竟入唔入市?是否要放棄不揀樓?
實地視察屋苑環境
有小家庭因為攪珠號碼非首10個之列，本應以為無希望，可是日前接獲房署通知，於2月底去揀樓，該準買家與母親居於將軍澳公屋一個約300呎單位已20多年。
對於樓價下行，該小家庭反而覺得要好好把握今次揀樓機會。據了解，該小家庭睇中元朗新居屋朗天苑，在經濟能力許可下，打算購入最大面積單位，實用面積約450平方呎，可揀2房。
正正心中已有目標和價位，該小家庭在揀樓前更實地視察屋苑環境，好好了解周圍建築物，向北、向南，望咩景，並初步搵到最合心水單位。事實上，實地睇過地盤後起碼心中有個印象，到當日揀樓時也能充份掌握單位的基本狀況，即使頭號心儀單位賣光，也可以有次選單位補上，不會盲舂舂入市。
Comments